Það sem hefur mótað mig minn persónuleika til dagsins í dag...
Að hafa alist upp á ættaróðalinu á Melum í Hrútafirði til 16 ára aldurs, verið í Kvennaskólanum og útskrifast stúdent þaðan 1984, starfaði hjá skattrannsóknarstjóra þegar „kaffibaunamálið“ stóð yfir á árinu 1984, hjá Sölusamtökum lagmetis þegar grænfriðungar í Þýskalandi stóðu fyrir utan þýskar Aldi verslanir og mótmæltu kaupum á vörunum okkar vegna hvalveiða Íslendinga og þegar Sovétríkin hrundu og lagmetisiðnaðurinn hér á landi þar með. Hef allar götur síðan borið mikla virðingu fyrir góðum rekstri en hef að sama skapi lítið þol fyrir slæmum rekstri. Starfað hjá TVG-ZIMSEN á miklum uppgangstímum í flugfrakt og flutningsmiðlun á Íslandi, kynnst þar upphafi Bónuss sem byggði alfarið á hugmyndum ALDI verslunarkeðjunnar þýsku sem ég þekkti af fyrri viðskiptum, einnig upphafi innkaupafyrirtækisins Baugs sem síðar varð annað og meira, farið í viðskiptanám á Bifröst að nálgast miðjan aldur, helgað flutningagreininni krafta mína allt til dagsins í dag...

Mentorar mínir í lífinu voru Krummi frændi á Melum sem ég dáði og leit óendanlega upp til í æsku. Kristján Jónsson eigandi og forstjóri K. Jónssonar á Akueyri - framleiðandi af guðs náð sem rak verksmiðju sína á þann hátt að hægt var að treysta orðum hans 100% - maður sem alltaf stóð við það sem hann sagði en var svo slæmur í almannatengslum að enn þann dag í dag er nafn fyrirtækis hans eingöngu þekkt fyrir framleiðsluklúður. Þórarinn Kjartansson upphafsmaður að komu Cargolux hingað til lands og stofnandi Flugflutninga og síðar Bláfugls. Maður sem ég lærði að meta meira en aðra menn og lærði það af að það eitt skiptir máli að vera heiðarlegur og maður sjálfur í viðskiptum. Allir þessir menn eru nú dánir. Ég er þeim óendanlega þakklát fyri r það sem þeir kenndu mér og fyrir þá leiðsögn sem þeir veittu mér.

Þessi yfirferð er sett saman í þeim tilgangi að skýra bakgrunninn – forsendurnar fyrir pólitískum skoðunum mínum sem eru skýrar og hafa mótast af því að búa á Íslandi síðustu 45 árin og fylgst með pólitík síðustu 35 árin. Alin upp á heimili þar sem Framsóknarflokkurinn var flokkurinn, hef starfað í hringiðu viðskipta þar sem gengið var út frá því að allir sem ætluðu sér frama styddu Sjálfstæðisflokkinn. Lærði snemma að hafa sjálfstæðar skoðanir á pólitík óháðar flokkadráttum og hef ímugust á tilhneigingu annarra til að setja mig í ákveðinn flokk. Hef reynt að styðja tiltekinn flokk en gafst upp á því endanlega á haustmánuðum og líður satt að segja mun betur á eftir.